هناك حيث حيات الثعابين والبشر
حيث الموت في كل طرفة عين ..... قدر
هناك ... حيث البرد القارس ليلا والظلام الأكثر وطأة وغدرا.
يقف الجبل شامخا في ظهر الجنود
يخفي الغدر... يخفي الموت
أيمن يتبقى له ثلاثة عشر يوما وتنتهي مدة صداقته وحكاياته مع الجبل.
ثلاثة عشر يوما وتنتهي أياما رأى فيها عيونا ساهرة يقتنصها رصاص الغدر والخيانة ... رأى أشلاء لأعز الحبايب.
ثلاثة عشر يوما وتنتهي أياما كان يوشوش فيها نسمات الهواء التي قلما تلفحه
"خدي بالك من أمي وإخواتي وأهل البلد كلهم"،
"لو انا قلت لك حاجة هتبلغيها لهم؟؟"،
..
..
"قوليلهم: أيمن راجل وسادد مكانه ويفديكم بروحه"
أيمن مش مصدق إنه هيسيب المكان .... خلاص هبطل خدمة!!!
طيب والعسكري المستجد هيعرف يسد مكاني!!!
أيمن نسي إنه كان في يوم من الأيام مستجد!!!
نسي أن مصر يولد لها دائما من طينها أبطال كلهم أيمن.
أيمن طلع فوق الجبل ونادى بأعلى صوته .... لييييييه ....13 يوووم ليييييييه ... أنا عاوز أفضل هنا .... أموت هنا ...
أيمن لاينسى الضابط محمود ....كان ضابط إحتياط وصمم أن يستمر في الجيش بعد إنتهاء مدته رغم إن عصابات التهريب قتلت إثنين من رجاله أمام عينيه وكان هو المقصود وكان أيمن شاهد ومشارك وكان ممكن يموت.
كل لحظة تمر عليه ينطق بالشهادة ويقول في نفسه لو رحت أروح راجل وما أروحش خاين ولا جبان... ولو حاولوا يعدوا هيكون على جثتي.
أيمن لم يأخذ من مصر إلا النفس والشمس ... لم تعطه شئ آخر قط.
بعض أصدقائه تسلل لليبيا وأحدهم ركب البحر لإيطاليا.
أيمن يعيش حياة البؤس والفقر مثله مثل أغلب أهل قريته.
أيمن بيفدي مصر بروحه
إنت بأة يا أبو لسان بتعمل إيه؟
وإنت يا أبو ملايين بتعمل إيه؟
وانت كمان يا أبو مركز وسلطة بتعمل إيه؟
أيمن هناك بيموت عشان تعيشوا .............. عيشوا
هناك تعليق واحد:
أمثال أيمن في بلدنا كتير هم الرجالة..هم الأسود..هم العيون السهرانة على الحدود، بيحموك من كل غادر، بيضحوا بروحهم علشان أنا وانت نعيش (هم خير أجناد الأرض) هم إللي يستاهلوا الدعاء ليل نهار. ربنا يحميهم ويحفظهم من كل خائن ما عرفش يعني إيه حبه لبلده؟ ما عرفش يعني إيه تضحيه؟يعني إيه إنتماء؟
إرسال تعليق