في جريدة المصريون كتب ابراهيم عبد الحميد : بتاريخ 14 - 4 - 2008
مزعل ابو العربى ليه يا بردعى
مزعل ابو العربى ليه يا بردعى
الرئيس: اهلاً يا بردعى...اخبارك ايه...طبعاً مبسوط فى دمياط...محافظه مافيهاش مشاكل...ومليانه مشبك..
المحافظ: يا سلام يا فندم، المحافظ اللى امه دعياله يمسك دمياط ...
الرئيس: عارف يا بردعى ... ان من حبى فى الدمايطه ناسبتهم...عارف لو زعلت الدمايطه هاعمل فيك ايه؟؟... هاوديك الغربيه...
المحافظ: يا افندم هو انا اقدر ازعلهم... ان شاء الله بكره يتقبلو الوضع ...واهى هوجه و تعدى...
الرئيس: قولى ايه السبب؟ انا اعرف ان الدمايطه ناس مش فاضيه ومش بتوع مشاكل...
المحافظ: بنعملهم مصنع بتروكيماويات فى رأس البر...لكنهم مش موافقين.
الرئيس: وايه اللى يزعل فى كده...مصنع يعنى انتاج ووظائف...
المحافظ: فيه عناصر مندسه يا ريس بتقول البيئه والسمك والسياحه فى رأس البر هتتدمر.
الرئيس: وده فعلاً صحيح؟
المحافظ: دى اشاعات مغرضه يا ريس...ابخره المصنع هتقتل البعوض و الناموس والدمايطه مش هيضطرو يستخدمو الفلت.
الرئيس: وانتم واثقين ان مستوى التلوث هيكون أمن...ولا هياخد الناس فى سكته...مع الناموس والهاموش.المحافظ:احنا واثقين يا ريس ...وبعدين احنا بنجذب استثمارات وبنخلق وظايف...زاى ماسيادتك امرت فى البرنامج الانتخابى.
الرئيس: هو انا قلت فى البرنامج الانتخابى يا بردعى موتو الدمايطه...وسممو السمك وطفشو المصطفين من راس البر.
المحافظ:لاء يا فندم....احنا عارفين ان سيادتك بتحب دمياط و عشان كده احنا بنجذب لهم استثمارات.
الرئيس: انت يا بردعى محافظ واير ليس ولا ايه...اوعى لتكون ممشى المحافظه اوف لاين...انت مش قاعد برده فى الفيلا اللى على النيل ومكتبك كمان بيطل على النيل وعارف ان دمياط مافيهاش بطاله...توافق تسكن جامب المصنع ده ولا هتخاف على صحتك وصحة عيالك!!!...
المحافظ: يا فندم دمياط فاتحه بيوت ناس كتيره من المحافظات المجاوره...والمصنع ده هيشغل المزيد...
الرئيس: طيب وليه راس البر...ماعملتوش المصنع ده فى اى منطقه صحراويه بعيده عن التجمعات السكانيه ليه..
المحافظ: الستثمر يا فندم مزاجه كده...
الرئيس: ومن اللى رخص للمستثمر و لم يهتم بالبيئه وبمهنه الصيد ولا بملايين الدمايطه..دول بيقولو الخساره هتزيد عن 60 مليار جنيه سمك و سياحه ومشبك. ازاى تجيبو استثمارات باليمين وتهلكوها بالشمال؟
المحافظ: يا فندم الناس عايزه تعوض المستثمرين تمن الارض عشان يعملوها محميه طبيعيه...
الرئيس: طيب وليه لاء ... مش قلتلك شاطرين وعايزين يحافظو على مدينتهم... من اللى صرح بالمصنع ده فى المكان ده يا بردعى..
.المحافظ:.....
الرئيس: ساكت ليه يا بردعى...
ردالمحافظ: يـ يـ يــ ففـ فـ نـدم...انا هاشكل لجنه لبحث الامر..
الرئيس: لجنه! ..... المصنع ده هيرمى مخلفاته فين يا بردعى...
المحافظ: فى النيل يا فندم...
الرئيس: وطبعاً المخلفات دى هتنزل البحر...والصيادين فى عزبة البرج هيصطادو من اين؟
المحافظ: ...من النيل و من البحر يا فندم ...
الرئيس: و المصطافين هيبلبطو فين يا بردعى؟
المحافظ: طبعاً فى البحر يا فندم ...
الرئيس: وطبعاً لما النيل و البحر يتلوثه...الناس هتموت من الجوع و من الحر يا بردعى... وبتشربو فى دمياط من اين يا بردعى؟
المحافظ: من النيل برده يا فندم.
الرئيس: وازاى توافق على المهزله دى يا بردعى...روح استسمح اهل دمياط وقول لهم ان الريس ما يردهوش اللى حصل... وان اصغر صنايعى ولا صياد أهم عنده من اى مستثمر مهما كان حجم استثماراته...وحتة الارض دى اعملوها جنينه عشان ولاد ابو العربى يتبسطو...
المحافظ: متشكر يا فندم... الدمايطه هيفرحو قوى...وهيدعولك...
الرئيس: يا بردعى...دمياط وشها حلو على المحافظين وان كنت مش مصدق...اسأل الجويلى و وزير...روح واعرفلى مين ابو مخ نضيف مسئول عن قرار اقامة مصنع كيماويات و سماد فى مدينه سياحيه زاى رأس البر...واعمله امر نقل ادارى فوراً الى توشكى...وانت كمان، تعطينى تمام بكره من مكتبك فى مجلس مدينة المحله!!!
ابراهيم عبد الحميد
هناك تعليق واحد:
اكيد دي قصة قصيرة فمسلسل القضاء علي الشعب الدمياطي قديم ومستمر منذ زمن بعيد ولكن المفيد هو صحوة ساكيني دمياط وان كانت متاخرة بعد الوقت فكم عدد سكان دمياط الذين يعانون من امراض الفشل الكلوي واماض الكبد الوبائي بسبب تلوث مياة نهر النيل وقدر الدمياطي ان يشرب بعد ان تتلوث بالمصانع علي ضفاف النيل في كل مدينة او قرية تمر به قبلهم وبالطبع مصنع سماد طلخا والمصانع المنتشرة في القاهرة والجيزة والصرف الصحي الذي مازال في بعض المدن يصرف في ماء النيل وخاصة المساجد المنتشرة علي ضفاف النهر بدون بيارات او صرف صحي واخيرا وليس اخر مصانع البتروكميائيات في الميناءو التلوث الناتج من استخدام الطلاءات المغشوشة والمحظورة من اجل الكبار نرجوا المقارة بين عدد الحالات المرضية في محافظة دمياط والمحافظات الاخري لنعلم الفرق وخاصة عزبة البرج والشيخ درغام
وربنا يكون في عون ساكني دمياط فهذا قدرهم من الاستعمار ان يكونوا خط الدفاع الاول و من حكومتهم ان يكونوا خط الابادة الاول من التلوث ومن اخوانهم ان يكونوا اخر من يشرب الماء بعد ان يشرب الاخرون ويغسلو اوعيتهم و....... والحمد لله علي الصحة ويحسدونا علي العمل اكيد عوزين يموتو الدمياطة علشان يحلوا مشكلة البطالة في باقي المحافظات!!!!!!!
إرسال تعليق